Тэмуджин Искандиров: Үлкен теннистегі үздік нәтиже

Ақтөбе қаласындағы Назарбаев Зияткерлік мектебінің оқушысы Тэмуджин Искандиров - үлкен теннистен үздік көрсеткіштердің иегері.

Зияткер жуырда Азия Теннис Федерациясының ұйымдастыруымен өткен ашық турнирлерге қатысып, жүлделі орындарды еншіледі. Атап айтар болсақ:

1. «ATF 16 & Under Astana «Babolat Open». Жұптық разряд: І орын.

2. «ATF 16 & Under Aktobe». Жұптық разряд: І орын, жеке разряд: ІІІ орын.

3. «Борис Квакты еске алуға арналған ATF 16 & Under». Жұптық разряд: І орын, жеке разряд: І орын.

🎾 12-16 жас аралығындағы балалар мен жасөспірімдерге арналған турнирде еліміздің түкпір-түкпірінен жиналған жас теннисшілер бас қосты. Сонымен қатар аталмыш жарыста көршілес мемлекеттің спортшылары да бақ сынады.

Тэмуджин үлкен тенниспен 3 жасынан бастап айналысады. Айтуынша, спорттың бұл түрін таңдауына әкесі себепкер болған. Жас теннисші өмір жолында өз әкесін үлгі тұтады әрі сол секілді спорт шебері болуды армандайды. Болашақта кәсіби теннисші болуды қалайтын Тэмуджиннің тағы бір үлгі тұтар тұлғасы – Роджер Федерер.

Сөзінше, спорт пен оқуды қатар алып жүру Тэмуджинге аса қиын емес. Қазір ол 2025 жылдың наурыз айында өтетін турнирге дайындалу үстінде. Әлем спортшылары бақ сынасатын додада үздіктер қатарынан көрінуіңе тілектеспіз, Зияткер!