Зияткерлік мектепте ашық есік күнінде Кентау қаласындағы «Достық» білім беру орталығының 60 оқушысы келіп, мектептің тыныс-тіршілігімен танысты. Оқушылар 3 топқа бөлініп, мектеп мұғалімдері зияткерлік білім ордасының сыныптарын аралатты.

Ең алдымен оқушылар, мектептің саз өнері/керамика сыныбын аралап, сазбалшықтан жасалған бұйымдармен және соңғы үлгідегі спорттық құрал-жабдықтармен жабдықталған мектептің спорт, фитнес залдарымен танысты.

Сонымен қатар, оқушылар мектептің инжиниринг сыныбында арнайы лазерлік құрылғының қалай жұмыс жасайтынын көріп, ерекше әсер алды.

Кездесу барысында оқушылар мектептің тіл қазына кешенімен қазақ тілі сыныбы, кітапхана және жылыжайды аралап, Зияткерлік мектеп жайында біршама ақпараттар алды.

Шара соңында оқушылармен мектеп директоры Балқан Қасымов акт залда бас қосып, Назарбаев Зияткерлік мектебінде білім алу үшін уақыттарын зая кетірмей, тыңғылықты дайындықтың қажет екенін түсіндірді.

Онымен қоса, оқушыларға зияткерлік мектепті дәріптеу және бейімдеу мақсатында «Kahoot» ойыны ойнатылды.